Mirija ya uzazi kujaa maji ni hali ambapo mirija ya uzazi hujaa majimaji na kuvimba, jambo ambalo linaweza kuzuia mimba kutungwa na kusababisha ugumba kwa mwanamke. Tatizo la mirija ya uzazi kujaa maji hujulikana kwa kitaalamu kama Hydrosalpinx.
Leo katika mada yetu ya blogu hii tutazungumzia sababu kadhaa zinazochangia mirija ya uzazi kujaa maji. Ungana nami katika kuchambua sababu hizi.
1) Maambukizi Ya Via Vya Uzazi (Pelvic Inflammatory Disease – PID).
Hii ni sababu kuu inayochangia mirija ya uzazi kujaa maji.
Pid husababishwa na magonjwa ya zinaa kama vile klamidia na kisonono, ambayo yanaweza kusababisha makovu kwenye mirija ya uzazi, hali ambayo huweza kupelekea mirija ya uzazi kujaa maji.
2) Endometriosis.
Endometriosis ni hali ambapo tishu zinazofanana na utando wa ndani wa mji wa mimba (endometrium) hukua nje ya mji wa mimba (uterus). Tishu hizi zinaweza kukua kwenye mirija ya uzazi na kusababisha mirija hiyo kujaa maji.
3) Mimba Iliyotungwa Nje Ya Kizazi (Ectopic Pregnancy).
Ikiwa mimba imetungwa kwenye mirija ya uzazi badala ya mji wa mimba, inaweza kuharibu mirija ya uzazi na kusababisha mirija hiyo kujaa maji.
4) Magonjwa Ya Zinaa (STIs) Yasiyotibiwa.
Maambukizi ya zinaa yasiyotibiwa yanaweza kuenea hadi kwenye mirija ya uzazi na kuleta uharibifu unaosababisha mirija hiyo kujaa maji.
5) Makovu Kwenye Mirija Ya Uzazi Baada Ya Upasuaji.
Makovu kwenye mirija ya uzazi (fallopian tube scarring) yanaweza kutokea baada ya upasuaji wa tumbo la chini au upasuaji wa mirija yenyewe. Makovu haya yanaweza kusababisha matatizo ya uzazi ikiwa ni pamoja na mirija ya uzazi kujaa maji (kuifanya isipitishe yai kwa urahisi) au mimba kutungwa nje ya kizazi (ectopic pregnancy).
Soma pia hizi makala:
- Mambo 6 Muhimu Usiyo yajua Kuhusu Kuziba Kwa Mirija Ya Uzazi Kwa Wanawake.
- Lijue Tatizo La Mimba Kutunga Nje Ya Kizazi (Ectopic Pregnancy).
HITIMISHO:
Ni muhimu kuelewa kuwa mirija ya uzazi kujaa maji kunaweza kusababisha ugumu wa kushika mimba kwa njia ya kawaida. Katika kesi nyingi, mtaalamu wa uzazi anaweza kutoa matibabu au miongozo kwa wenzi wanaopitia hali hii.
Matibabu yanaweza kujumuisha upasuaji wa kurekebisha mirija, matibabu ya maambukizi, au matibabu ya uzazi kama vile IVF (In Vitro Fertilization).