Maumivu wakati wa tendo la ndoa kwa mwanamke hujulikana kitaalamu kama dyspareunia.
Hili ni tatizo linalowakumba wanawake wengi kwa nyakati tofauti. Maumivu haya yanaweza kuwa ya muda mfupi au ya muda mrefu, na yanaweza kusababishwa na sababu za kimwili au za kisaikolojia.
Leo katika mada yetu ya blogu hii tutazungumzia sababu kadhaa zinazochangia mwanamke kupata maumivu wakati wa tendo la ndoa. Ungana nami katika kuchambua sababu hizi.
1) Ukavu Ukeni.
Ukosefu wa ute wa kutosha hufanya uke uwe mkavu na kusababisha msuguano mkali wakati wa tendo la ndoa.
Tatizo la ukavu ukeni linaweza kusababishwa na mabadiliko ya homoni (hasa baada ya kujifungua, unyonyeshaji, au menopause), kutokuwa na msisimko wa kutosha kabla ya tendo (foreplay), matumizi ya baadhi ya dawa kama vile antihistamines na antidepressants.
2) Maambukizi Ya Uke (Vaginitis).
Maambukizi ya uke kama vile maambukizi ya bakteria ukeni (bacterial vaginosis), maambukizi ya fangasi ukeni (vaginal candidiasis), magonjwa ya zinaa (STIs) kama vile herpes au chlamydia yanaweza kusababisha mwanamke kupata maumivu wakati wa tendo la ndoa.
3) Vaginismus.
Hii ni hali inayosababisha misuli ya uke kukaza bila hiari (involuntarily) wakati wa kuingiza kitu ndani ya uke, kama vile uume, kidole, tampon, au hata wakati wa uchunguzi wa daktari. Wasiwasi na hofu vinaweza kusababisha hali hii, hivyo kuchangia mwanamke kupata maumivu makali wakati wa kufanya tendo la ndoa.
4) Majeraha Au Vidonda.
Majeraha yaliyosalia baada ya vidonda vya keketwa (female genital mutilation) au upasuaji vinaweza pia kupelekea mwanamke kupata maumivu wakati wa tendo la ndoa.
5) Matatizo Ya Kisaikolojia.
Hofu, msongo wa mawazo, hasira, na matatizo mengine ya kiakili yanaweza kuathiri msisimko na kusababisha maumivu wakati wa tendo la ndoa.
Lakini pia wasiwasi na hofu vinaweza kusababisha misuli ya uke kukaza (Vaginismus), na kufanya tendo la ndoa kuwa chungu.
6) Endometriosis.
Hii ni hali ambapo tishu zinazopaswa kuwa ndani ya mfuko wa uzazi (uterus) hukua sehemu nyingine kama kwenye mirija ya uzazi au nyonga. Hali hii huchangia mwanamke kupata maumivu wakati wa tendo la ndoa.
7) Fibroids Na Cysts.
Vinyama vinavyokua kwenye mfuko wa uzazi (uterine fibroids) au uvimbe kwenye ovari (ovarian cysts) vinaweza kusababisha mwanamke kupata maumivu wakati wa tendo.
Namna Ya Kupunguza Maumivu Wakati Wa Tendo La Ndoa Kwa Mwanamke:
Zifuatazo ni njia zinazoweza kusaidia kupunguza maumivu wakati wa tendo la ndoa kwa mwanamke na kufanya tendo liwe lenye starehe zaidi:
1) Tumia Vilainishi Vya Uke (Lubricants).
Ikiwa uke wako ni mkavu, unaweza kutumia vilainishi vya maji (water-based lubes) au vya asili kama mafuta ya nazi (coconut oil).
Epuka vilainishi vyenye harufu au kemikali kali kwani vinaweza kusababisha muwasho.
2) Chukua Muda Wa Kutosha Kwa Maandalizi (Foreplay).
Uke unahitaji muda wa kutosha kuwa tayari kwa tendo la ndoa. Maandalizi kama busu, mgusano, na masaji yanaweza kusaidia kuongeza msisimko na ute wa uke.
3) Jaribu Mkao Mbalimbali (Sex Positions).
Baadhi ya mikao inaweza kusababisha shinikizo zaidi na maumivu wakati wa tendo la ndoa. Jaribu mikao inayoruhusu udhibiti wa kina cha uume, kama mwanamke akiwa juu ili aweze kudhibiti mwendo na kina cha uume.
4) Epuka Kufanya Tendo Wakati Wa Maambukizi.
Ikiwa una maambukizi ya bakteria, fangasi, au magonjwa ya zinaa, unaweza kuhisi maumivu wakati wa tendo. Unashauriwa kutibu maambukizi kwanza kabla ya kuendelea na tendo la ndoa.
5) Epuka Msongo Wa Mawazo Na Hofu Ya Tendo La Ndoa.
Wasiwasi mwingi unaweza kufanya uke ujikaze bila hiari (vaginismus), na hivyo kusababisha maumivu wakati wa tendo la ndoa.
Tumia njia za kupunguza msongo wa mawazo kama vile yoga, meditation, au ushauri wa kitaalamu.
6) Pata Uchunguzi Wa Daktari Ikiwa Maumivu Yanaendelea.
Ikiwa maumivu ni makali au hayapungui hata baada ya kufanya mabadiliko, ni vyema kupata uchunguzi wa daktari.
Baadhi ya matatizo ya uzazi kama vile endometriosis, uvimbe kwenye kizazi (uterine fibroids), au maambukizi ya nyonga (PID) yanaweza kusababisha maumivu makali wakati wa tendo la ndoa.
HITIMISHO:
Maumivu wakati wa tendo la ndoa si jambo la kawaida na linaweza kudhibitiwa kwa njia sahihi. Ikiwa unahisi maumivu mara kwa mara, usisite kutafuta msaada wa daktari au mtaalamu wa afya ya uzazi.