Uvimbe kwenye kizazi ni uvimbe usio wa saratani (benign tumours) unaojitokeza kwenye misuli ya mfuko wa uzazi (uterus).
Uvimbe huu pia hujulikana kwa kitaalamu kama uterine fibroids/leiomyomas, unaweza kuwa na ukubwa tofauti na unaweza kuathiri wanawake kwa njia mbalimbali.
Dalili za uvimbe kwenye kizazi kwa mwanamke zinaweza kutofautiana kulingana na ukubwa, idadi na mahali uvimbe ulipo. Baadhi ya dalili za uvimbe kwenye kizazi kwa mwanamke ni pamoja na;
1) Mabadiliko Katika Mzunguko Wa Hedhi.
Uvimbe kwenye kizazi unaweza kusababisha mabadiliko katika mzunguko wa hedhi, kama vile;
- Hedhi Nzito/Hedhi Ndefu.
Mwanamke mwenye uvimbe kwenye kizazi anaweza kupata hedhi nzito, ambayo inaweza kuhusisha kutokwa na damu nyingi inayoweza kudumu zaidi ya siku 7, hali inayojulikana kama menorrhagia.
- Hedhi Yenye Maumivu.
Mwanamke mwenye uvimbe kwenye kizazi anaweza kupata hedhi yenye maumivu, hali inayojulikana kama dysmenorrhea.
2) Maumivu Wakati Wa Kujamiiana.
Uvimbe kwenye kizazi unaweza kusababisha maumivu wakati wa kujamiiana, hasa kama uvimbe uko karibu na shingo ya kizazi.
3) Kukojoa Mara Kwa Mara.
Uvimbe mkubwa kwenye kizazi unaweza kushinikiza (kubana) kibofu cha mkojo, na hivyo kusababisha hisia ya kutaka kukojoa mara kwa mara au kushindwa kumaliza mkojo vizuri.
4) Kuvimba Kwa Tumbo.
Uvimbe mkubwa kwenye kizazi unaweza kusababisha kuongezeka kwa ukubwa wa tumbo, mara nyingi unaoweza kufanana na ujauzito wa muda wa miezi michache.
5) Maumivu Ya Tumbo.
Mwanamke anaweza kuhisi maumivu ya tumbo la chini, ambayo yanaweza kuwa ya mara kwa mara au kudumu.
6) Maumivu Ya Nyonga.
Maumivu ya nyonga yanaweza kutokea, hasa wakati wa hedhi au wakati wa tendo la ndoa.
7) Kukosa Choo (Constipation).
Wakati mwingine, uvimbe kwenye kizazi unaweza kusababisha matatizo ya mmeng’enyo wa chakula kama kukosa choo au kupata choo kigumu.
8) Kushindwa Kupata Mimba.
Uvimbe kwenye kizazi unaweza kuathiri uwezo wa mwanamke kupata mimba (ugumba).
Je ungependa kujifunza zaidi kuhusu uvimbe kwenye kizazi kwa mwanamke?
Kama jibu ni NDIYO, bonyeza hapa: Lijue Tatizo La Uvimbe Kwenye Kizazi (Uterine Fibroids) Kwa Wanawake Na Tiba Yake.
HITIMISHO:
Ni muhimu kwa wanawake wanaopata dalili hizi kutafuta ushauri wa daktari ili kufanyiwa uchunguzi sahihi na kupata matibabu yanayofaa.